Floroj sur la rivero

Sur la rivero Dordonjo algoj amase floras en junio. La longaj haroj ŝvebas super nun videbla fundo. Jam de jaroj oni ne fosas por ebligi trairon de ŝipoj, tial en somero la akvo estas malprofunda, kaj la grundo videbla. La algoj disvastiĝis, densiĝis, kaj eble post kelkaj jaroj tro granda kvanto da putrantaj algoj en tro malmulta akvo, senoksigenigos la akvon kaj mortigos la fiŝojn.

De pluraj tagoj mi volis foti ilin antaŭ la velkado, sed neniam prenas tempon halti sur la ponto, de kie oni klare vidas ilin onde moviĝi. Post kelkaj minutoj oni perdas la tempkonscion, tiel ke pasis duonhoro antaŭ ol mi subite memoris ke mi jam malfruas.